પુષ્પા ગેંગ ત્રાટકી:દહેગામનાં નાંદોલમાં આવેલાં ઔષધવન વનમાં તસ્કરો ત્રાટક્યા, ચંદનનાં છ વૃક્ષો કાપી ચોરી કરીને ફરાર
દહેગામના નાંદોલ ગ્રામ પંચાયતની ગૌચરની જમીનમાં આવેલા ઔષધવનમાંથી રાત્રીના અંધકારમાં પુષ્પા સ્ટાઈલમાં તસ્કરો આરામથી ચંદનના છ વૃક્ષો કાપીને વાહનમાં ભરીને નાસી ગયાની ઘટના પ્રકાશમાં આવતા તાલુકા વિકાસ અધિકારી, મામલતદાર તેમજ પોલીસ દોડતી થઇ ગઈ હતી. તસ્કરો લાખો રૂપિયાની કિંમતના ચંદનના છ વૃક્ષો ચોરીને નાસી જતાં અંદરના કોઈ માણસની સંડોવણી હોવાની શક્યતા વર્તાઈ રહી છે.
*નાંદોલનાં ઔષધવનમાંથી છ ઝાડ ચોરી ગયા
ગાંધીનગરમાં છેલ્લા ઘણા સમયથી ચંદન ચોર સક્રિય થઈને આરક્ષિત ચંદનના વૃક્ષો કાપી ચોરીને સિફતપૂર્વક પલાયન થઈ રહ્યા છે. હમણાં ગયા મહિને મહુડીથી ફતેપુરા ત્રણ રસ્તા પરથી કારમાંથી પોલીસે તપાસ કરતાં 178 કિગ્રા સુખડ અને ચંદનના લાકડા સાથે 9.34 લાખનો મુદામાલ ઝડપી પાડી પાંચ ઈસમોની ધરપકડ કરી લેવાઈ હતી. ત્યારે દહેગામના નાંદોલનાં ઔષધવન માંથી લાખોની કિંમતના ચંદનના વૃક્ષોની ચોરીની ઘટના પ્રકાશમાં આવી છે.
*ચંદન ચોર ટોળકી ઔષધવનમાં ત્રાટકી
નાંદોલ ગ્રામ પંચાયતની ગૌચરની જમીનમાં ઔષધવન ઊભું કરવામાં આવ્યું છે. અહીં વિવિધ જાતના ઔષધીય વૃક્ષોની સાથે ચંદનના વૃક્ષો પણ ઉછેરવામાં આવ્યા છે. ત્યારે રાત્રીના સમય દરમ્યાન ચંદન ચોર ટોળકી ઔષધવનમાં ત્રાટકી હતી. અને રાત્રીના અંધકારમાં આરામથી ચંદનના છ વૃક્ષોની ડાળીઓ કાપી નાખીને લાખોની કિંમતના આખે આખા થડ કોઈ વાહનમાં ભરીને પલાયન થઈ ગયા હતા.
*ચોર ગેંગ વાહન તેમજ કટર લઈને આવ્યા
આ બનાવની જાણ સવારે થતાં જ તાલુકા વિકાસ અધિકારી, મામલતદાર, ગામના તલાટી કમ મંત્રી તેમજ સ્થાનિક પોલીસ ઔષધવન દોડી ગયા ગયા હતા. જ્યારે એક ચંદનનું ઝાડ કાપી નાખ્યાં બાદ તેને સ્થળ ઉપર જ મૂકીને તસ્કરો નાસી છુટયા હોવાનું પોલીસને જાણવા મળ્યું હતું. ત્યારે ચંદન ચોર ગેંગ વાહન તેમજ કટર લઈને આવ્યા હોવાનું બહાર આવ્યું છે. તો ચંદનના વૃક્ષો કાપતા પહેલા ચંદન ચોર ગેંગે ઉક્ત સ્થળની રેકી કરીને ચોરીની ઘટનાને અંજામ આપવામાં આવ્યો ઉપરાંત કોઈ અંદરના માણસની સંડોવણી હોવાની શક્યતા પણ વર્તાઈ રહી છે. અહેવાલ – તેજાજી ચૌહાણ
