દેશના ટેલિવિઝન માર્કેટમાં આ સમયે એક જોરદાર ટક્કર જોવા મળી રહી છે. સ્માર્ટફોન માર્કેટની જેમ ટીવી માર્કેટમાં હરિફાઈ ચાલી રહી છે. આ સમયે ટેલિવિઝન માર્કેટમાં લગભગ 70થી વધારે કંપનીઓ વચ્ચે હરિફાઈ છે, જેના કારણે પ્રાઈસ વૉર વધી ગઈ છે.
બે વર્ષ પહેલા સુધી દેશમાં આનાથી અડધી સંખ્યામાં ટીવી કંપનીઓ હતી. પ્રાઈસ વોરને કારણે ટીવીની કિંમતોમાં 40 ટકા ઘટાડો જોવા મળ્યો છે. ખાસ વાત એ છે કે, આવનારા સમયમાં આ માર્કેટમાં વધારે મેન્યુફેક્ચર્સ ઉતરવાની શક્યતા છે. માટે પ્રાઈસ વૉરમાં પણ વધારે તેજી જોવા મળી શકે છે.
ટીવી માર્કેટમાં ચાલી રહેલા પ્રાઈસ વૉરને આ રીતે સમજી શકાય છે. 2016માં 32 ઈંચ HD રેડી ટેલિવિઝનની કિંમત 13,500 રુપિયા હતી. આજે આ જ કિંમતમાં ગ્રાહકોને આ જ સાઈઝમાં સ્માર્ટ અને ફુલ એચડી ટીવી સેટ મળી રહ્યો છે. 2016માં આ સ્પેસિફિકેશન સાથે ટીવી ખરીદવા માટે 28,000-29000 રુપિયા ખરચવા પડતા હતા. આજે 43 ઈંચ સાઈઝનું સ્માર્ટ 4K TV સેટ 30,000 રુપિયામાં વેચાઈ રહ્યું છે, જે બે વર્ષ પહેલા 45,000-50,000 રુપિયામાં મળતુ હતું.
માર્કેટ લીડર સેમસંગ, LG અને સોની સાથે શાઓમી, થોમસન અને ટીસીએલ જેવી કંપનીઓ પણ માર્કેટમાં ઉતરી છે. સુપર પ્લાસ્ટ્રોનિક્સના CEO અવનીત સિંહ મારવાહે જણાવ્યું કે, દેશના ટીવી માર્કેટમાં અનેક ઓનલાઈન કંપનીઓએ એન્ટ્રી કરી છે, જે 24 ઈંચ, 32 ઈંચ અને 43 ઈંચની સ્ક્રીન સાઈઝ વાળા ટીવીની પ્રાઈસ વૉરમાં આગેવાની કરી રહી છે. હવે આ પ્રાઈસ વૉર મોટી સ્ક્રીન સાઈઝ વાળા ટીવી માટે પણ શરુ થઈ ગયું છે.
