લાખોની ચોરી:પાટણમાં દંપતી ચારધામની યાત્રાએથી પરત આવી દીકરાનાં ઘરે ગયું અને તસ્કરોએ હાથસાફ કર્યો, 2.60 લાખના મુદ્દામાલની ચોરી
* 2.10 લાખનાં સોના-ચાંદીના દાગીના અને રૂ.50 હજારની રોકડની ચોરી
પાટણ શહેરની ગાયત્રી મંદિર સામે આવેલી અયોધ્યા નગર સોસાયટીમાં એક નિવૃત્ત શિક્ષકનાં બંધ ઘરમાંથી તસ્કરો રૂ 2 લાખ 60 હજારની મતાની ચોરી કરી ગયા હતા. આ બનાવની જાણ થતાં પોલીસ ઘટના સ્થળે દોડી ગઇ હતી અને એફએસએલ તથા ડોગસ્કવોર્ડની મદદથી તપાસ હાથ ધરી હતી.
દંપતી પુત્રને મળવા અમદાવાદ ગયું હતું
આ બનાવની મળતી માહિતી મુજબ પાટણનાં ગાયત્રી મંદિર રોડ ઉપર અને તેની સામે આવેલી અયોધ્યાનગર સોસાયટીમાં રહેતા અને 2018માં દિયોદર તાલુકાનાં ચકવાડા ગામે આવેલા એસ.આર. મહેતા વિદ્યાલયમાંથી શિક્ષક તરીકે નિવૃત્ત થયેલાં ભરતભાઇ જોઇતાભાઇ પટેલ (ઉ.વ.63) તથા તેમનાં પત્નિ હંસાબેન બંને જણા તા. 19-6-2022નાં રોજ ચારધામ યાત્રા કરીને પાટણ પરત આવ્યા હતા અને ઘરમાં સાફસફાઇ કરીને આ દંપતી બપોરે ત્રણ વાગે અમદાવાદનાં ઓગણજ ખાતે તેમનાં દીકરાનાં ઘેર ગયા હતા.
પાડોશીએ ચોરીની જાણ કરી
તા. 22-6-22નાં રોજ તેઓ અમદાવાદ ખાતે હતા. ત્યારે સવારે તેમને તેમનાં પડોશીએ ફોન કરીને કહેલું કે, તમારા ઘરનો દરવાજો ખુલ્લો પડ્યો છે. આથી તેમણે તેમનાં ભત્રીજાને જાણ કરતાં તે તેમનાં ઘરે તપાસ માટે ગયા હતા. આ દરમિયાન ભરતભાઇ પટેલ સવારે અમદાવાદથી પાટણ આવ્યા હતા. તેઓએ જોયું તો ઘરનો દરવાજો ખુલ્લો હતો ને સામાન વેરવિખેર પડ્યો હતો.
2.60 લાખના મુદ્દામાલની ચોરી
તેઓએ બંને તિજોરીની તપાસ કરતાં અંદરથી તસ્કરોએ રૂ 50 હજાર રોકડા તથા સોના-ચાંદીના દાગીના જણાયા નહોતા. જેમાં ત્રણ તોલાનું રૂા.70 હજારનું સોનાનું મંગળસુત્ર, રૂ. 25 હજારની સોનાની એક તોલાની બે વીંટી, મળી કુલે રૂ.180 લાખનાં સોનાનાં દાગીના તથા ચાંદીના 15 સિક્કા ચાંદીની બે જોડ તથા ચાંદીનો કંદોરો નંગ-1, ચાંદીની ગાય, ગણપતિ, લક્ષ્મીજી મૂર્તિઓ, એક ગ્લાસ એક કિલો કિં. રૂ. 30 હજાર મળી કુલ રૂ. 2 લાખ 60 હજારની મતાની ચોરી કરી ગયા હતા. આ બનાવની જાણ કરતાં પી.આઇ. એસ.એ. ગોહિલ તથા સ્ટાફ ઘટના સ્થળે દોડી ગયા હતા. આ બનાવ અંગે પોલીસે ગુનો નોંધી તપાસ હાથ ધરી છે. અહેવાલ – મુરતુજલી સૈયદ
