*નવી દિલ્હી:*. રાહુલ ગાંધી ફરીથી કોંગ્રેસના અધ્યક્ષ બની શકે છે. રાહુલે પોતે આ અંગે સંકેત આપ્યા છે. સૂત્રો મુજબ, શનિવારે કોંગ્રેસ વર્કિંગ કમિટી (સીડબલ્યુસી)ની બેઠકમાં સીનિયર નેતાઓએ અધ્યક્ષ બનવાના કરેલા અનુરોધ પર કોંગ્રેસના સીનિયર નેતા રાહુલ ગાંધીએ કહ્યું કે, તેઓ વિચાર કરશે. તેમણે એમ પણ કહ્યું કે, તેમને પાર્ટી નેતાઓ તરફથી વિચારધારાના સ્તર પર સ્પષ્ટતાની જરૂર છે. કેટલાક નેતાઓએ કહ્યું કે, ચૂંટણી સુધી તેમને કાર્યકારી અધ્યક્ષ બનાવવામાં આવે. સીડબલ્યુસીની બેઠકમાં શનિવારે નિર્ણય કરાયો છે કે, આગામી વર્ષે ઓગસ્ટ-સપ્ટેમ્બરમાં પાર્ટી અધ્યક્ષની ચૂંટણી કરાવાશે. તે સાથે જ, એ નિર્ણય પણ લેવાયો કે, આગામી એક નવેમ્બરથી કોંગ્રેસ સદસ્યતા અભિયાન ચલાવશે, જે આગામી વર્ષ 31 માર્ચ સુધી ચાલશે. કોંગ્રેસના સંગઠન મહાસચિવના સી વેણુગોપાલે જણાવ્યું કે, પાર્ટી અધ્યક્ષની ચૂંટણી 21 ઓગસ્ટથી 20 સપ્ટેમ્બર વચ્ચે થશે. કોંગ્રેસ અધ્યક્ષ સોનિયા ગાંધીની અધ્યક્ષતામાં મળેલી બેઠકમાં પાર્ટીના પૂર્વ અધ્યક્ષ રાહુલ ગાંધી, મહાસચિવ પ્રિયંકા ગાંધી વાડેરા, રાજસ્થાનના મુખ્યમંત્રી અશોક ગેહલોત, છત્તીસગઢના મુખ્યમંત્રી ભૂપેશ બધેલ, પંજાબના મુખ્યમંત્રી ચરણજીત ચન્ની અને અન્ય ઘણા નેતા સામેલ હતા. પૂર્વ વડાપ્રધાન મનમોહન સિંહ અસ્વસ્થ હોવાના કારણે અને સીનિયર નેતા દિગ્વિજય સિંહ અને આરપીએન સિંહ અંગત કારણોથી આ બેઠકમાં સામેલ થઈ શક્યા ન હતા.
કોંગ્રેસના ‘જી 23’ ગ્રુપના નેતાઓ દ્વારા પાર્ટીની અંદર સંવાદની માગ કરવા પર અને તાજેતરના મહિનાઓમાં ઘણા નેતાઓએ પાર્ટી છોડ્યાની પૃષ્ઠભૂમિમાં આ બેઠક થઈ. ગત દિવસોમાં કોંગ્રેસના સીનિયર નેતાઓ ગુલામ નબી આઝાદ અને કપિલ સિબલે સીડબલ્યુસીની બેઠક બોલાવવાની વાત કરી હતી. સીડબલ્યુસીની બેઠક એવા સમયે થઈ જ્યારે સુષ્મિતા દેવ, જિતિન પ્રસાદ, લુઈજિન્હો ફાલેરિયો અને ઘણા અન્ય સીનિયર નેતા છેલ્લા કેટલાક મહિનામાં કોંગ્રેસ છોડીને બીજા પક્ષોમાં જોડાઈ ગયા છે. કોંગ્રેસ કાર્ય સમિતિની બેઠક એ દ્રષ્ટિએ પણ મહત્વની હતી કે, પાર્ટી અધ્યક્ષની ચૂંટણી લાંબા સમયથી પડતર છે. કેટલાક મહિના પહેલા કોરોના વાયરસ મહામારીને કારણે અધ્યક્ષની ચૂંટણી સ્થગિત કરી દેવાઈ હતી, જે પહેલા જૂન મહિનામાં પ્રસ્તાવિત હતી.
