થરાદમાં દુકાન ધરાવતા એક ભાગીદારે બીજાનો ખોટો દસ્તાવેજ બનાવી નગરપાલિકામાં રજુ કરી લાયસન્સ પોતાના નામે કરી દીધું હતું. આ બનાવ અંગે પોલીસ ફરિયાદ નોંધાવતાં પોલીસે આઇપીસી મુજબ ગુનો દાખલ કરી વધુ કાર્યવાહી હાથ ધરી હતી. બનાસડેરીના કાતરવા પ્લાન્ટમાં સુપરવાઈઝર તરીકે નોકરી વિક્રમભાઇ રૂપસીભાઇ ચૌધરી (રહે.ઢેરીયાણા,તા.વાવ ) એ 2019માં ગામના ઇશ્વરભાઇ નાગજીભાઇ ચૌધરી અને બબાભાઇ નામના બે ભાઇઓ સાથે ભાગીદારીમાં થરાદ વિજય બિઝનેશ શોપિંગ સેન્ટરમાં દુકાન ભાડેથી રાખીને ન્યુ રામદેવ પ્રોવિઝન સ્ટોર્સ નામની કરીયાણા દુકાન ચાલુ કરી હતી.
જે દુકાનના પ્રોપ્રાઇટર તરીકે વિક્રમભાઇએ પોતાનું દુકાનનું લાયસન્સ નગરપાલિકા થરાદથી મેળવેલું હતું. શરૂઆતમાં બંને સાથે દુકાન સંભાળ્યા બાદ વિક્રમભાઇને બનાસ ડેરી લખનઉ પ્લાન્ટમાં નોકરી મળતાં ત્યાં જતા રહ્યા હતા. ત્યારબાદ દુકાનના હિસાબ બાબતે બબાભાઇ અને ઇશ્વરભાઇને વાત કરતાં બબાભાઇએ તારે દુકાને કંઇ લેવા દેવા નથી, શાના હિસાબ હોય, કોઇ હિસાબ કરવાનો નથી. આ દુકાન મારા નામની છે તેમ વાત કરી દુકાનનો હિસાબ કરવામાં પણ રાજી ન હતા કે રૂપિયા પરત આપી દુકાનમાંથી ભાગીદારી કાઢવાની વાત કરવા છતાં પણ માનતા ન હતા. ઉલટાનું તેમણે ધમકી આપતાં અગાઉ આ અંગે પોલીસ ફરિયાદ કરી હતી.
બીજી બાજુ આ દુકાનનું લાયસન્સ તેમના નામનું હોવા છતાં પણ બબાભાઇ નાગજીભાઇ ચૌધરીએ તેના નામે કરી દિધું હતું તેવું જાણવા મળતાં તેમણે નગરપાલિકામાં અરજી આપીને દુકાનની લાયસન્સ તથા બીજા કાગળોની માંગણી કરતાં નકલ મળી હતી. સ્ટેમ્પમાં ચકાસણી કરતાં સોગંદનામામાં સ્ટોર્સના પ્રોપ્રાઇટર હક લખી આપેલ હતો. જેમાં વિક્રમભાઇ લખનઉ હોવા છતાં પણ લખી આપનારમાં વી.આર.ચૌધરી તરીકે તેમની સહી કરેલી હતી. તેમાં રહેલ જેવી સહી તેઓ કરતા ન હોઇ આ બાબતે બબાભાઇને પુછતાં કોઇ જવાબ આપ્યો ન હતો.
