હાઈલાઈટ્સ:
- બાળકોને ઉઠાવી જનારી ગેંગ ફરી રહી છે, આવો મેસેજ કરનારો યુવક ભરાયો
- પોલીસે યુવક વિરુદ્ધ ગુનો નોંધીને ધરપકડ કરીને આગળની કાર્યવાહી હાથ ધરી
- યુવકના વાયરલ થયેલા મેસેજ બાદ સમગ્ર વિસ્તારના વાલીઓમાં ચિંતા જોવા મળી હતી
અમદાવાદઃ શહેરમાં બાળકોને ઉઠાવી જનારી ગેંગ સક્રિય થઈ હોવાનો ખોટો મેસેજ વાયરલ કરનારા યુવકને ભારે પડી ગયું છે. બિમલ પટેલ નામના એક યુવકે આ રીતે ખોટો મેસેજ વાયરલ કર્યો હતો. જે બાદ સોલા પોલીસે યુવક વિરુદ્ધ ફરિયાદ નોંધી અને આગળની કાર્યવાહી હાથ ધરી છે. પોલીસે આ યુવકની ધરપકડ કરીને આગળની તજવીજ હાથ ધરી છે. બે દિવસ પહેલાં સોલા વિસ્તારમાં રહેતા બિમલ પટેલ નામના આ યુવકે બાળકોને ઉઠાવી જનારી ગેંગ ફરી રહી હોવાના ખોટા મેસેજ વાયરલ કર્યા હતા. જે બાદ સમગ્ર વિસ્તારમાં હાહાકાર મચી ગયો હતો. વાલીઓમાં પણ ચિંતા જોવા મળી હતી. ત્યારે હવે આ રીતે ખોટા મેસેજ વાયરલ કરનારો યુવક બરાબરનો ભરાઈ ગયો છે.
ગુજરાત પોલીસ અને રાજ્ય ગૃહ મંત્રીને ટેગ કર્યા
પ્રાપ્ત રિપોર્ટ મુજબ, સોલા વિસ્તારમાં રહેતા બિમલ પટેલ નામના યુવકે બે દિવસ પહેલાં ખોટો મેસેજ વાયરલ કર્યો હતો. યુવકે ટ્વિટ કરીને એવું લખ્યું હતું કે, શહેરમાં બાળકોને ઉઠાવી જનારી ગેંગ સક્રિય બની છે. જે બાદ સમગ્ર વિસ્તારમાં ભયનો માહોલ સર્જાયો હતો. વાલીઓમાં પણ ભારે ચિંતા જોવા મળી હતી. એટલું જ નહીં યુવકે ટ્વિટ કરીને ગુજરાત પોલીસ અને રાજ્ય ગૃહ મંત્રીને ટેગ કર્યા હતા. યુવકે એવું પણ લખ્યું હતું કે, બોપલ અને ગોતા વિસ્તારમાં બાળકોને ઉઠાવી જનારી ગેંગ ફરી રહી છે. એક એક બાળક ઉઠાવી ગયા હોવાનો પણ ઉલ્લેખ કર્યો હતો.
ટ્વિટ બાદ પોલીસ પણ દોડતી થઈ
આ ટ્વિટ વાયરલ થયા બાદ પોલીસ પણ એક્ટિવ થઈ હતી. જે બાદ પોલીસે કાર્યવાહી હાથ ધરી હતી. પોલીસ તપાસમાં સામે આવ્યું કે, આ યુવકે ખોટી માહિતી ફેલાવીને વાલીઓમાં ચિંતા ઊભી કરી છે. એ પછી પોલીસે બિમલ પટેલ નામના યુવક વિરુદ્ધ ગુનો નોંધ્યો હતો અને તેની ધરપકડ કરી હતી. પોલીસે જ્યારે આ યુવકની પૂછપરછ કરી તો જાણવા મળ્યું કે, તે જીપીએસસની પરીક્ષાની તૈયારીઓ કરી રહ્યો છે. વાયરલ થયેલા મેસેજના આધારે તેણે આ માહિતી ફરતી કરી હતી.
ખોટો મેસેજ વાયરલ કરનારો યુવક ભરાયો
પોલીસના જણાવ્યા મુજબ, આ ખોટો મેસેજ વાયરલ થયા બાદ વાલીઓમાં ચિંતા જોવા મળી હતી. વાલીઓમાં પણ ભયભીત બની ગયા હતા. આવા ખોટા મેસેજના કારણે સ્કૂલો અને સોસાયટીઓમાં ભયનો માહોલ સર્જાયો હતો. એટલે પોલીસે તરત આ મામલે કાર્યવાહી હાથ ધરી હતી. એ પછી પોલીસે યુવકની ધરપકડ કરીને આઈપીસીની કલમ 501 ખ મુજબ ગુનો નોંધીને આગળની કાર્યવાહી હાથ ધરી હતી. મહત્વનું છે કે, સોશિયલ મીડીયામાં વાયરલ થતા દરેક મસેજે સાચા નથી હોતા. કેટલાંક લોકો આવા મેસેજ મળ્યા બાદ અન્ય લોકોને ફોરવર્ડ કરતા હોય છે. જેના કારણે ભયનો માહોલ સર્જાતો હોય છે.
સુરતમાં પણ આવુ બન્યુ હતુ
થોડા દિવસ પહેલાં સુરત જિલ્લાના માંગરોળ વિસ્તારમાં પણ આવી જ ઘટના બની હતી. બે શખસોએ આવી જ રીતે ખોટી માહિતી ફેલાવી હતી. બે શખસોએ ઓડિયો ક્લિપ વાયરલ કરીને એવું કહ્યું હતું કે, બાળકોને ઉઠાવી જનારી ગેંગ સક્રિય બની છે. એ પછી આ મેસેજ પોલીસ સુધી પહોંચ્યો હતો. જે બાદ પોલીસે તપાસ હાથ ધરીને બંને શખસોને ઝડપી પાડ્યા હતા. ઓડિયો વાતચીતમાં બંને શખસો એવી વાત કરી રહ્યા હતા કે, ઝંખવાવના જંગલમાં 17-18 બાળકોની લાશનો ઢગલો પડ્યો છે. બાળકોના શરીરને કાપીને તેમના અવયવો કાઢી લેવામાં આવ્યા છે. આ રીતે ખોટી માહિતી ફેલાવીને ભયનો માહોલ ઉભો કરવા બદલ પોલીસે બંને શખસોને પ્રસાદ આપીને સીધા કર્યા હતા.
