મહેસાણા ONGCમાં ગેસ ગળતરની ઘટનાને કારણે તંત્ર દોડતું થયું છે. અહીં મોડી રાત્રે ગેસ લીક થવાની શરુઆત થતાં આસપાસના 3 ગામોના લોકો પ્રભાવિત થયા છે. લોકો ગળા
પાલનપુર/મહેસાણા- શુક્રવારના રોજ મહેસાણા જિલ્લાના એક ગામ નજીક ONGC(Oil and Natural Gas Corporation)માં ગેસ ગળતરની ઘટનાને કારણે લોકોના જીવ તાળવે ચોંટ્યા હતા. ઉલ્લેખનીય છે કે લીક થયેલો ગેસ જ્વલનશીલ અને ઝેરી નહોતો પરંતુ નજીકના વિસ્તારમાં રહેતા લોકોએ આંખ અને ગળામાં બળતરા થયા હોવાની ફરિયાદ કરી હતી. મહેસાણાના જિલ્લા વિકાસ અધિકારી ઓમ પ્રકાશે આ જાણકારી આપી છે. આ ઘટનાને કારણે ONGC અને સ્વાસ્થ્ય તંત્ર દોડતું થયું છે.
મહેસાણાના કસલપુર ગામ પાસે આવેલા એક કુવામાં રાતના લગભગ 2 વાગ્યાની આસપાસ ગળતરની શરુઆત થઈ હતી. ઉલ્લેખનીય છે કે આ ગામમાં લગભગ 850 લોકો રહે છે. આ ગામ ઘટનાસ્થળથી લગભગ દોઢ કિલોમીટર દૂર છે. PTI સાથેની વાતચીતમાં અધિકારી ઓમ પ્રકાશે જણાવ્યું કે, કૂવામાં જે કમ્પ્રેસ્ડ એર પંપ કરવામાં આવે છે તેનું ગળતર થતુ હતું. આ ગેસ જ્વલનશીલ અથવા ઝેરી નથી. લોકોએ ગળા અને આંખમાં સામાન્ય બળતરાની ફરિયાદ કરી હતી. હવાની દિશા કસલપુર ગામ તરફ હોવાને કારણે તે લોકો પ્રભાવિત થયા હતા. આ ગામના લોકોએ શ્વાસ લેવામાં તકલીફ પડતી હોવાની પણ ફરિયાદ કરી છે.
ઉલ્લેખનીય છે કે આસપાસના 3 ગામના લગભગ 40 લોકોએ આંખ અને ગળામાં બળતરાની ફરિયાદ કરી છે. જેના કારણે ONGCને આદેશ આપવામાં આવ્યો છે કે તે ગેસનું વિશ્લેણ કરે અને તપાસ કરે કે કૂવામાંથી જે ગેસનું ગળતર થયું તે કેવા પ્રકારનો છે. જિલ્લા તંત્ર દ્વારા કસલપુર ગામમાં OPD તૈયાર કરવામાં આવ્યા. આ સિવાય અન્ય બે ગામમાં પણ આ પ્રકારની સુવિધા ઉભી કરવામાં આવી. કોઈ પણ ઘટનાને ટાળવા માટે ફાયર ફાઈટર્સ તૈનાત કરવામાં આવ્યા. તબીબો અને એમ્બ્યુલન્સ પણ ગામમાં હાજર છે.
અધિકારીએ જણાવ્યું કે, જો કોઈ ગંભીર સ્થિતિ સર્જાય તો અમારો સ્થળાંતરનો પ્લાન તૈયાર છે. લોકોને સુરક્ષિત સ્થળ પર લઈ જવા માટે બસો પણ તૈયાર છે અને એમ્બ્યુલન્સ પણ તૈનાત છે. ઉલ્લેખનીય છે કે આ પહેલા પણ મહેસાણા ONGCમાં આ પ્રકારની ઘટના બની હતી. અવારનવાર આ પ્રકારની ઘટના બનવાને કારણે લોકોમાં રોષ જોવા મળ્યો છે. તેઓ આ બાબતે કોઈ ચોક્કસ નિરાકરણ લાવવાની માંગ કરી રહ્યા છે.
કિરણ ગીરી ગૌસ્વામી
